Vetsovetson'i Mamisoa
Ity bilaogy ity dia natao ho fanandratana sy ho fitehirizina ny teny Malagasy ary koa ho fampahafantarana ny kolontsaina Malagasy. Ato no hitantarako sy hizarako izay hitako sy tsapako. Tantaraiko ato avokoa izay rehetra mahafinaritra ahy, manitikitika ahy, eny fa na ny masosotra koa aza, izany rehetra izany dia amin'ny teny vMalagasy madiodio. Ahitana sokajy samihafa ny lahatsoratra (Tononkalo, politika, fiaraha-monina...) Ny tanjona dia hivelaran'ny teny Malagasy sy hanehoana ny maha-kanto azy. Ary koa ho fifampitaizana amin'ny alalan'ny fanehoan-kevitra mba ahitana izay mahasoa ho fivelaran-tsaina sy ho fampandrosoana. Mirary antsika hazoto hamaky ary haneho hevitra ihany koa raha ilaina.Ny bilaogiko amin'ny teny frantsay sy teny anglisy (http://mammysou.blogspot.com/).
07/19,2016
Tononkalo: Mirary ny soa sy ny tsara...
Nampidirin'i mammysou :
08:40
Mirary herinandro sambatra ho antsika.
Manaova mafana fa ny andro mangatsiaka.
Ny tanjona iriana dia ny mba ho tafita.
Ka hifaly hirehareha amin'ireo zava-bita.
Mirary fahazotoana ho an'ireo handeha hiasa.
Aza kivy, hotanteraka anie izay kinasa.
Milofosa, mahereza ary mazotoa.
Miasà am-pifaliana sy amin-kerim-po.
Mirary fiononana ho an'ny tra-pahoriana.
Ny Tompo hampitràka ary koa hampangina.
Mankahery ireo rehetra misedra-olana.
Tsarovy fa ny Tompo no tena vahaolana.
Mirary fahasalamana ho an'izay marary.
Manàna finoana, ny Tompo tsy manary.
Mirary ny soa sy ny tsara ho antsika mianakavy.
Vonona hatrany miatrika ny hoavy.
Raveloaritiana Mamisoa (@mammysou)
Hevitra (0) | Verindrohy (trackback) (0) | Tononkalo